નિર્ણય

નિર્ણય

આકરો હતો એ નિર્ણય
પણ સ્વાભાવિક લાગ્યો એ નિર્ણય
સૌ જન ટોળા મહી સાથ
ભાગતો એ નિર્ણય
માતૃભૂમિની પરિચિત પાળો
છોડીને પરદેશ પામવાનો એ નિર્ણય

પૈસો હશે ત્યાં અધિક
અને જલસો હશે ત્યાં અધિક
અને વળી
જયારે ફરીશું પાછા સ્વદેશ
માન મોભો મળશે અધિક

કૈંક જોવા જાણવાની ઈચ્છા
કૈક કરી બતાવવાની તમન્ના
કૈક માન મરતબો ની શોધ
કૈક દુનિયા ઘુમવાની હોંશ

આ સર્વનું સરવૈયું સમ
બન્યો એ નિર્ણય
હવે જયારે સરવૈયું જીવન નું
કાઢ્યું ત્યારે ખરેખર
સમજાયો એ નિર્ણયનો મર્મ।

અતિત અને આજ

અતિત અને આજ

વતનની  મુલાકાત  હવે
પહેલાની જેમ કેમ
ના ધડકાવે હૈયુ મારુ
સ્પર્શ કરું માટી વતનની
કેમ ના ગુંજે તાર અંતરે 

શું અમે બદલાયા
કે વતન બદલાયું
ખબર છે કે
સંબંધો બદલાયા અને
સંબંધીઓ પણ બદલાયા

વડીલો ઘટતા ગયા
ઉષ્મા ઘટતી ગઈ
રીસામણા ને મનામણાં
ના હક કરવાના દાવાવાળા
સ્નેહીઓ પણ ઘટતા  ગયા

સરકતા સમયની સાથે
અમે સૌ સરકતા રહ્યા
વહેતા સમયના વહેણમાં
સૌ નિજાનંદે વહેતા રહ્યા
સંસ્મરણો મીઠા થયા
વર્તમાન ખાટો થયો

છે વર્તમાનની વાસ્તવિકતા
આ મન કહે મને
મન તો છે ડાહ્યું
એ સમજે સમયનો ખેલ
પણ પેલું પાગલ હૈયું
એને કોણ સમજાવે?

કે હવે આપણા જ પરાયા થયા?