પર્યાવરણ

યાદ આવે છે  -

શિયાળા ની ખુશનુમા સવાર
ગરમ રજાઈ છોડી ને
કડકડતી ઠંડી માં
ગરમ ગરમ ચાની હૂંફ
ને છાપા ના ગરમાગરમ
સમાચાર

ઉનાળાની લુખ ઝરતી બપોર
બારીઓ પર ટાંગેલી
ઠંડી, ટપકતી, ટટ્ટી
ફરફર ફરતો પંખો
કાપે ગરમ હવાના ટુકડા
ઠંડા બરફના ગોળા પર

ચોમાસા ની ભીંની સાંજ
પાણીના ખાડામાં છબ છબીયાં
કાગળની હોડી  ને
નાયલોન ની છત્રી
ગરમ ભજીયાની સુવાસ
જીભ સળવળે

શરદપૂનમ ની મધુરી રાત
ખુશનુમા હવા
ગોળમટોળ ઝૂલતો ચાંદ
દૂધપૌંઆ
ગવાતા ગરબા ને
બંગડીઓનો રણકાર

અહા મણાય
ઋતુ  ઋતુ ની મસ્તી
જો પર્યાવરણ
પૂજાય, સમજાય
ને સચવાય।

મીનળ પંડ્યા