ઉડવા ચાહે અંતરીક્ષમાં

આતમ  મારો
ઉડવા ચાહે અંતરીક્ષમાં
ફફડે પાંખો અંતર મહી
મથે આંબવા આકાશને

કીચડ આ સંસારનો
ખુચવે પગ ઊંડા
અતિ ઊંડા
કેમ કરું હું ઉર્ધ્વગતિ
જ્યાં ફસાયો જીવ
આ માયાજાળમાં

સાચું શું, ખોટું શું
યોગ્ય અયોગ્ય શું
મારું શું ને સૌનું શું
ગમતું અણગમતું
વચ્ચે અટવાયો અહમ

ખેચ આ ઉપર નીચે તણી
ઉજાસ ભણી
અંધકાર ભણી
ઘૂંટે હૈયું રોજે રોજ

પણ શાણા સૌ ઉચરે
આને કહેવાય
જીવન અહિયાં
સંસાર છે આ
આવું ચાલ્યા કરે


માટે જીવ સમજ  તું
આવું બને
સંસાર છે આ
ઊંચું નીચું
ચાલ્યા કરે

ને આ શાણા
સંસારીયો
જીવ્યા કરે
ઉજવ્યા કરે

શું આ જીવ શીખશે
કદી
આ શાણપણ નું ડહાપણ?


મિનલ પંડ્યા