પાકકો ઘડો

લાગતું  હતું કે
ઘડાઈ ગયા હવે તો
કર્યો પાક્કો ઘડો જીવનનો
હવે તો
પણ જરા વાગી એક ઠેસ
કોઈની કટુવાણી કેરી
તૂટી પડી એક કોર
છૂટ્યું લાગણીઓનું
દ્વાર અને વહી પડી
સાચવીને ગોઠવેલી
લાગણીઓ અકબંધ
છલકાયુ અંતર
ને જે લાગતો પાકકો ઘડો
તે વિખરાયો ચારેકોર

લાગતું હતું કે
ગોઠવાઈ ગયા જીવનમાં
હવે તો
સમજી ગયા આ
સંબંધોનું જાળું
આવડી ગયું
અમને ઉકેલતા
પણ ગાંઠ આવી એક એવી
કે ગોઠવેલું સૌ
વીખરાયું
ને ગૂંચવાયું
અંદર બહાર
સઘળું અસ્તવ્યસ્ત

લાગતું હતું કે
શિખી ગયા સમાજની
સૌ રીતભાત
મોહરા વાંચવાની ભાષા
હવે તો
આવડી ગઈ
પણ ના,
હજી મળે નવા મોહરા
મળ્યા કરે
ખોટા વંચાયા કરે
ગેરસમજ થી
સમજાયું કે બાકી છે
હજી તો ઘણું
જીવનમાં શીખવાનું


મીનળ પંડ્યા