પાકકો ઘડો

લાગતું  હતું કે
ઘડાઈ ગયા હવે તો
કર્યો પાક્કો ઘડો જીવનનો
હવે તો
પણ જરા વાગી એક ઠેસ
કોઈની કટુવાણી કેરી
તૂટી પડી એક કોર
છૂટ્યું લાગણીઓનું
દ્વાર અને વહી પડી
સાચવીને ગોઠવેલી
લાગણીઓ અકબંધ
છલકાયુ અંતર
ને જે લાગતો પાકકો ઘડો
તે વિખરાયો ચારેકોર

લાગતું હતું કે
ગોઠવાઈ ગયા જીવનમાં
હવે તો
સમજી ગયા આ
સંબંધોનું જાળું
આવડી ગયું
અમને ઉકેલતા
પણ ગાંઠ આવી એક એવી
કે ગોઠવેલું સૌ
વીખરાયું
ને ગૂંચવાયું
અંદર બહાર
સઘળું અસ્તવ્યસ્ત

લાગતું હતું કે
શિખી ગયા સમાજની
સૌ રીતભાત
મોહરા વાંચવાની ભાષા
હવે તો
આવડી ગઈ
પણ ના,
હજી મળે નવા મોહરા
મળ્યા કરે
ખોટા વંચાયા કરે
ગેરસમજ થી
સમજાયું કે બાકી છે
હજી તો ઘણું
જીવનમાં શીખવાનું


મીનળ પંડ્યા

પર્યાવરણ

યાદ આવે છે  -

શિયાળા ની ખુશનુમા સવાર
ગરમ રજાઈ છોડી ને
કડકડતી ઠંડી માં
ગરમ ગરમ ચાની હૂંફ
ને છાપા ના ગરમાગરમ
સમાચાર

ઉનાળાની લુખ ઝરતી બપોર
બારીઓ પર ટાંગેલી
ઠંડી, ટપકતી, ટટ્ટી
ફરફર ફરતો પંખો
કાપે ગરમ હવાના ટુકડા
ઠંડા બરફના ગોળા પર

ચોમાસા ની ભીંની સાંજ
પાણીના ખાડામાં છબ છબીયાં
કાગળની હોડી  ને
નાયલોન ની છત્રી
ગરમ ભજીયાની સુવાસ
જીભ સળવળે

શરદપૂનમ ની મધુરી રાત
ખુશનુમા હવા
ગોળમટોળ ઝૂલતો ચાંદ
દૂધપૌંઆ
ગવાતા ગરબા ને
બંગડીઓનો રણકાર

અહા મણાય
ઋતુ  ઋતુ ની મસ્તી
જો પર્યાવરણ
પૂજાય, સમજાય
ને સચવાય।

મીનળ પંડ્યા

યાદ આવે છે - મુગ્ધાવસ્થા

યાદ આવે છે - મુગ્ધાવસ્થા

યાદ આવે છે આજે
કોલેજના એ દિવસો
સવારે દસ ને પાંચ ની બસ
એ થોડું તૂટેલું  બસ સ્ટેન્ડ
બહેનપણીઓની રાહ
ને કંસેશન નું કાર્ડ

કોલેજ ની કેન્ટીનમાં
દર મંળવારે મળતા ઢોસા
સાથે કોક ના કેન
ચણા જોર ગરમ ને
ખાડાના દાળવડા

લેક્ચર હોલ્સ ને
કેમિસ્ટ્રી ની લેબ
પરીક્ષાની ચિંતા ને
મધરાતની ચા
અડધી રાતે ફૂટતા પેપર

કોલેજ ના રસ્તામાં
યુવાનોની લાંબી લાઈન
તેરી પ્યારી પ્યાર સુરત અને
લાલ છડી મેદાન ખડી નું
હવામાં ગુંજન

થોડું લાગે કર્ણપ્રિય
થોડું અજુગતું
દિલને ધડકાવતું
ને સ્મૃતિ માં મલકાતું

એ સંગીત પ્રોગ્રામો  ને
ચૂંટણી નું કેન્વાસીંગ
હોળીની રમઝટ ને
વેકેશન ની મઝા
કોલેજના છેલ્લા દિવસે
એકબીજાને નહિ ભૂલવાના કોલ

આહ એ કોલેજના દિવસો
બચપણમાં થી યુવાનીમાં
એ સરકતા દિવસો
યાદ અપાવે જીવનભર
ખાટી મીઠી ચટાકેદાર

મીનળ પંડ્યા

યાદ આવે છે આજે - બચપણ

યાદ આવે છે આજે - બચપણ

મણિનગર ની એ ગલીઓ
એ ગિલ્લી ડંડા ની હરીફાઈ
ને  દોરડા કુદવાની શરતો
પગથિયાં રમવાની મઝા
ને થપ્પા નો થનગનાટ

મોડી રાતે હીંચકે ઝૂલતા
મલક આખાની  વાતો
બિનાકાગીતમાલા ના  ગીતો
અમીન સાયાની ની વાતો
ને વિવિધ ભારતી ના રેલાતા સૂરો

સગા વ્હાલાની અવરજવર
મિત્રો ની અવિરત હાજરી
ઘર આંગણે જૂતા ની હાર
ઈડલી ઢોસા ની જ્યાફત
બમ્બો ભરીને બનતી ચા

અગાશી માં બેસીને સાંજે
ગણતા પક્ષીઓની ઘરસફર
ધાબે સુતા રાત્રે ગણતા
અસંખ્ય તારાઓની રમઝટ
કહેતા હે તારાઓ ઉઠવું મુજને
ઠીક સવારે છ ને ટકોરે

શનિવારે વહેલી સવારે
ઝગમગ ની જોતા રાહ
ક્યારે આવે ને ક્યારે વાંચીએ
એક બેઠકે કરીએ પૂરું
મિયાં ફુસકી ને દલા તરવાડી
બકોર પટેલ ને છકો મકો

ઉતરાણ દિવાળી બળેવ, નવરાત્રી
દાદાજી નું શ્રાદ્ધ ને સંવત્સરી
કાકા કાકી,ફોઈ ને ફુઆ
ભાઈઓ બહેનો ભેગા મળી
શીખડ પુરી જમવાનું
ને વાતો કરતા ઊંઘી જવાનું

મીનળ પંડ્યા

તુંડે તુંડે ગણિત ભિન્ના

જણે જણે  જુદું ગણિત

કોઈને છે પૈસાનું ગણિત
ક્યાં વાપર્યા ને ક્યાં સાચવ્યા
કેટલા કમાયા ને કેટલા આપ્યા
છેવટે કેટલું બાંધ્યું ગાંઠે

કોઈને છે કામનું ગણિત
બસ જીવન કામનો બોજ
કેટલું કર્યું ને કેટલું બાકી
ક્યાં સરવાળો ને ક્યાં બાદબાકી

કોઈને છે સંબંધોનું ગણિત
કોને મળ્યા ને કોને જાણ્યા
કોણે  બોલાવ્યા ને કોણે ટાળ્યા
સંબંધો ક્યાં બન્યા ને ક્યાં તૂટ્યા

કોઈને છે ઓળખાણોનું ગણિત
ક્યાં ઓળખાણ ને ક્યાં પહેચાન
કેટલો ફાયદો કોનાથી ક્યાં નુકશાન
ક્યાં ખોડુ આ ખાણ દળદાર

કોઈની છે બસ અહંમ નું ગણિત
ક્યાં મળ્યું માન  ને ક્યાં અપમાન
ક્યાં પોસાયો ને ક્યાં ઘવાયો અહંકાર
હું નો  સરવાળો  ને તું ની બાદબાકી

કોઈને  છે પ્રેમ નું ગણિત
ક્યાં આપ્યું ને કેટલું આપ્યું
બસ ખુશ છે જે વહેચવામાં
તેને દિલે છે બસ સરવાળો

મીનળ પંડ્યા